वीरगंज, १५ माघ/ युनाइटेड नेपाल फाउन्डेसन वीरगंजले वीरगंज कपडा बैंकलाई कपडा सहयोग गरेको छ ।
फाउन्डेसनका अध्यक्ष आकाश दास, सचिव पीयूष अग्रवाल र कार्यक्रम संयोजक कुनाल श्रीवास्तवले ३ बोरा र २ झोला कपडा सहयोग गरेको वीरगंज कपडा बैंकका अध्यक्ष लालबाबु सिंहलाइ बताए ।
फोटो : सौजन्य
फाउन्डेसनका अध्यक्ष दासले वीरगंज कपडा बैंकले विगत लामो समयदेखि विपन्न तथा असहायहरुका साथै आगलागी र बाढी पिडितहरुको घरदैलोमा पुगेर निस्वार्थ रुपमा गरिरहेको सेवाभावले आफूहरु निकै प्रभावित भएको बताए। अहिले चिसोको समयमा न्यानो कपडा खरिद गर्न असमर्थ विपन्न तथा असहायहरुलाई सहज रुपले न्यानो कपडा उपलब्ध होस् भन्ने ध्येयका साथ वीरगंज कपडा बैंकको सत्कार्यमा हातेमालो गरेको र आगामी दिनमा पनि साथ सहयोग रहने प्रतिबद्धता ब्यक्त गरे।
सो अवसरमा कपडा बैंकका अध्यक्ष सिंहले “तपाई संग धेरै छ भने हामीलाई दिएर जानुस् र तपाईंसँग छैन वा आवश्यकता छ भने हामीसँग निशुल्क लिएर जानुस्” भन्ने मुलमन्त्रलाई आत्मसात गरी विगत ६ वर्ष देखि वीरगंज-८ मा कार्यालय स्थापना गरी सेवा प्रवाह गर्दै आइरहेको बताए। उनले जाडोको बेला कम्बल, शाल, ज्याकेट, स्वेटर, इन्नर, टोपी, पाईन्ट र सर्ट लगायतका न्यानो कपडाहरु सहयोग गर्न मानवताप्रेमी जनमानसलाई आग्रह गरे।
सो अवसरमा वीरगंज कपडा बैंकका कोषाध्यक्ष मनोज मिश्रा र कर्मचारी शोभा देवी लगायतको सहभागीता रहेको थियो ।