वीरगंज, २४ माघ। वीरगंज कपडा बैंकले वीरगंज महानगरपालिका वडा नं २२ मनियारीमा बिहीवार निश्शुल्क कपड़ा वितरण गरेको हो ।
चिसोको समयमा विपन्न तथा असहायहरुको जनजीवन कष्टकर हुने भएकोले निश्शुल्क कपडा वितरण गरिएको प्रमुख अतिथी तथा कपडा बैंकका बरिष्ठ सल्लाहकार अधिवक्ता प्रकाश कुमार उपाध्यायले बताए। उनले दिनदुखी तथा असहायहरुको सेवा सहयोग नै मानवताको सर्वोत्तम धर्म भएकोले आआफ्नो आम्दानीको ५ देखि १०% समाजिक सेवामा खर्चिएर मानवता बलियो बनाउनु पर्नेमा जोड दिए।
आइतवारदेखि शुक्रवारसम्म बिहान १०.३० बजेदेखि ५ बजेसम्म कपडा बैङ्कको कार्यालय वीरगंज -८ बाट दिनदुखी तथा असहायहरुलाई निश्शुल्क कपड़ा उपलब्ध गराऊँदै आएको बैङ्कले राज होजियरीले सहयोग स्वरुप उपलब्ध गराएको ११० थान नयाँ स्वेटर र ट्रयाकसुटको साथै अन्य पुराना कपडाहरु गरी एक हजार थान कपड़ा वितरण गरिएको सदस्य निला कुमारी रामले बताइन्।
वीरगंज कपडा बैंकका अध्यक्ष लालबाबू सिंहको अध्यक्षतामा भएको सो कार्यक्रममा वीरगंज महानगरपालिका-२२ का वडा सदस्य उर्मिला देवि राम, बुनेल राम, दिपक साह, द्वारका प्रसाद यादव, असर्फी प्रसाद यादव, सामुदायिक प्रहरी कुम्हालटोलका सचिव श्रवण बहादुर रायमाझी, समाजिक अभियन्ता प्रकाश थारु, सन्जय मण्डल, शोभा देवी लगायतको सहभागिता थियो ।
