वीरगंज। हिन्दू धर्मावलम्बीका महान योद्धा, तपस्वी र न्यायको प्रतीक भगवान श्री परशुरामको जयन्ती तथा अक्षय तृतीयाको अवसरमा बुधवार वीरगंज गहवामाई मंदिरको प्राङ्गणमा शुभकामना कार्यक्रम सम्पन्न भएको छ।
ब्राह्मण समाज नेपाल, पर्साका अध्यक्ष कामेश्वर मिश्रको सभापतित्वमा सम्पन्न कार्यक्रममा प्रमुख अतिथि देवनाथ उपाध्याय रहेका कार्यक्रममा वक्ताहरूले भगवान परशुरामको जीवन, संघर्ष र समाजप्रतिको समर्पण बारे प्रकाश पार्दै यस्तो धार्मिक पर्वले सामाजिक ऐक्यबद्धता, सांस्कृतिक जागरण तथा राष्ट्रिय एकताको सन्देश दिने विश्वास व्यक्त गरे। आजको समयमा परशुरामको शिक्षाबाट प्रेरणा लिएर समाजमा न्याय, सत्य र धर्मको स्थापनाका लागि सक्रिय भूमिका खेल्न आवश्यक रहेको वक्ताहरुले बताए।
बृहस्पति फाउन्डेशन नेपालको आयोजनामा कार्यक्रम भएको फाउन्डेशनका अध्यक्ष डा. पुरुषोत्तम दुबेले जानकारी ग़राए।कार्यक्रममा स्थानीय धर्मगुरु, समाजसेवी, शिक्षाविद्, पत्रकार, महिला प्रतिनिधि, युवा तथा सर्वसाधारणको उल्लेखनीय सहभागिता रहेको थियो। धार्मिक, सांस्कृतिक र सामाजिक दृष्टिकोणले महत्वपूर्ण मानिने यस अवसरमा पर्साका स्थानीय बासिन्दा तथा विभिन्न क्षेत्रका प्रतिनिधिहरूको उत्साहजनक उपस्थिति रहेको थियो। मन्तव्य कार्यक्रमपछि सहभागीहरूलाई प्रसाद वितरण गरिएको थियो। यसैगरी, स्थानीय कलाकारहरूको सांस्कृतिक कार्यक्रम प्रस्तुत गरेका थिए।
आयोजक बृहस्पति फाउन्डेशन नेपाल र श्री परशुराम जयन्ती समारोह समितिले कार्यक्रमलाई सफल बनाउन प्रत्यक्ष–परोक्ष रूपमा साथ र सहयोग गर्ने सम्पूर्ण व्यक्तिहरूप्रति आभार व्यक्त गर्दै आगामी दिनमा अझ प्रभावकारी र व्यापक कार्यक्रमहरू सञ्चालन गर्ने प्रतिबद्धता जनाएका छन्। यस कार्यक्रमले धार्मिक सद्भाव, सांस्कृतिक पहिचान र सामाजिक एकतालाई अझ सुदृढ बनाउने अपेक्षा गरिएको छ। परशुराम जयन्ती समारोह समिति, पर्साका संयोजक पं रतनेश तिवारीले कार्यक्रम सञ्चालनमा महत्वपूर्ण भूमिका निर्वाह गरेका थिए ।
