काठमाडौँ, १ साउन — देशभरि गएको तीन महिनामा विपद्का घटना चुलिँदै गएका छन् । वैशाखदेखि असारसम्मको अवधिमा मात्रै २ हजार ६५ वटा विपद् सम्बन्धी घटना भएका छन् । ती घटनामा परी ९३ जनाको मृत्यु भएको छ भने २२ जना अझै बेपत्ता छन् ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणले सार्वजनिक गरेको तथ्यांक अनुसार बाढी, पहिरो, चट्याङ, आगलागी, सर्पदंश, हावाहुरीलगायतका घटनाले देशमा मानवीय र भौतिक क्षति गहिरो बनाइरहेको देखिन्छ ।
तीन महिनामा मात्र बाढीका १३७ घटना भएका छन्, जसमा १३ जनाको मृत्यु र २२ जना बेपत्ता भएका छन् । रसुवाको भोटेकोशीमा असार २४ गते आएको बाढीले मात्रै ठूलो जनधनको क्षति गराएको छ । हिमताल विष्फोटका कारण आएको बाढीले घर, खेत, बाटो र पुल बगाएको थियो।
प्राधिकरणका प्रवक्ता सुरेश सुनारका अनुसार, विपद्का घटनामा परी हालसम्म ४४५ जना घाइते भएका छन् भने ४ हजार १३६ परिवार प्रभावित भएका छन्।
थप विपद् विवरण यस्तो छः
-
पहिरो : १७५ घटनामा ६ जनाको ज्यान गयो
-
चट्याङ : २६ जनाको मृत्यु
-
आगलागी : १४ जनाको ज्यान गयो, १,०४८ परिवार प्रभावित
-
जनावरको आक्रमण : १२ जनाको मृत्यु
-
लेक लागेर : ११ जनाको मृत्यु
-
सर्पदंश, हावाहुरी, भारी वर्षा : दर्जनौं पीडित र क्षति
कुन घटनाबाट कति प्रभावित ?
-
बाढी : १,२४६ परिवार
-
आगलागी : १,०४८ परिवार
-
अन्य (पहिरो, चट्याङ्, सर्पदंश आदि) : सयौँ परिवार
सरकार र सरोकारवाला निकायलाई अब समयमै सूचना, पूर्वतयारी र राहत कार्यमा बढी सजग हुन जरुरी देखिन्छ । यदि यस्तो स्थितिमा पूर्व तयारी नभए, विपद्ले अझै धेरै जनधनको क्षति गर्न सक्छ।
