वीरगंज – नेपाल–भारत सिमानामा अवस्थित प्रमुख व्यापारिक केन्द्र, सिरसिया सुख्खा बन्दरगाह (ड्राइपोर्ट) बाट करिब १८ लाख रुपैयाँ बराबरको विदेशी मदिरा रहस्यमय रूपमा गायब भएको खुलासा भएको छ। यस घटनाले भन्सार प्रशासनको पारदर्शिता र जवाफदेहितामाथि गम्भीर प्रश्न उठाएको छ।
सर्लाही निवासी व्यवसायी वासुदेव साहले अष्ट्रेलियन ब्रान्ड रोयल मुस्कसा मोस्केटो (Royal Musksa Moscato) नामक मदिरा पिके ट्रेडर्समार्फत टेन्डर प्रक्रियाबाट खरिद गरेका थिए। तर, सामान लिन भन्सार पुगेका साहलाई टेन्डरअनुसारको १०,४०५ लिटर मदिराको सट्टा केवल ९,४१८ लिटर मात्र प्राप्त भयो। बाँकी ९८७ लिटर मदिरा (अन्दाजी मूल्य १८ लाख रुपैयाँ) बिना कुनै स्पष्ट विवरण बेपत्ता भएको पाइएको छ।
व्यवसायी साहका अनुसार जब उनले यो विषयमा भन्सार अधिकारीहरूसँग स्पष्टीकरण मागे, उनीहरू “जति परिणाम छ, त्यति नै बुझ्नु” भन्दै पन्छिए र अन्ततः गाडी चढेर स्थलबाट पलायन भए।
“यो पहिलो घटना होइन,” साहले अभितक मीडियासँगको कुराकानीमा भने, “सिरसिया ड्राइपोर्टमा यस्ता चोरी, बेथिति र अनियमितता पटक–पटक भइरहेका छन्। तर सधैंजसो भन्सार प्रशासन मौन बस्छ।”
टेन्डरमार्फत भित्र्याइएको सामान शंकास्पद रूपमा हराउनु, र भन्सार अधिकारीहरूको उदासीनता तथा मौनता देखिनु आफैमा मिलेमतोको संकेत भएको स्थानीय व्यापारीहरूको आरोप छ।
घटना बाहिरिएपछि स्थानीय नागरिक समाज, उद्योग–व्यवसाय प्रतिनिधिहरू र सरोकारवाला निकायहरूले घटनाको छानबिन गर्न र दोषीमाथि कडा कारबाही गर्न सरकारसँग माग गरेका छन्।
यो प्रकरणले भन्सार प्रणालीप्रति सर्वसाधारणको आक्रोश थप चर्किएको छ, र पारदर्शिता तथा सुशासनको गम्भीर अभाव रहेको संकेत दिएको छ।
