अभितक डेस्क- टेस्ट क्रिकेटबाट विराट कोहली र रोहित शर्माको संन्यासले भारतीय क्रिकेटलाई पुनर्निर्माणको संघारमा पुर्याएको छ। इंग्ल्यान्ड भ्रमणका लागि घोषणा हुने टिममा पहिलोपटक यी दुई स्तम्भ खेलाडीको नाम रहने छैन। सम्भावित नयाँ कप्तानको रूपमा शुबमन गिलको चर्चा छ, तर विदेशी भूमिमा उनको प्रदर्शन औसतभन्दा कमजोर रहेको देखिन्छ।
युवा ब्याटर यशस्वी जयसवाल, श्रेयस अय्यर, सरफराज खान र ऋषभ पन्त जस्ता खेलाडीले पूर्व कप्तानहरूको स्थान लिनुपर्नेछ। बलिङमा अनुभवी मोहम्मद शमी र रवीन्द्र जडेजाका साथ वासिङटन सुन्दर, प्रसिद्ध कृष्ण र मोहम्मद सिराजजस्ता नयाँ अनुहारबाट आशा गरिएको छ।
पूर्व खेलाडी र विज्ञहरूका अनुसार टिम चुनौतीपूर्ण चरणमा छ, तर भारतीय क्रिकेटको गहिरो प्रतिभा भण्डारले समयसँगै नयाँ नेतृत्व र स्थायित्व ल्याउने विश्वास गरिएको छ। पाँच टेस्टको शृंखलाबाट सुरु हुने यो यात्राले भारतीय क्रिकेटको नयाँ दिशा तय गर्नेछ।
