वीरगंज — ठाकुरराम बहुमुखी क्याम्पसमा विद्यार्थीहरुले गरेको तालाबन्दी मङ्गलवार खोलिएको छ । संयुक्त विद्यार्थी संगठनको निरन्तर दबाबपछि अब नक्कली शैक्षिक प्रमाण पत्रको आधारमा भएका नामांकन र मतदान काण्डको औपचारिक छानबिन प्रक्रिया अघि बढ्ने भएको हो।
संगठनले लगभग १८ जना विद्यार्थीले नक्कली प्रमाणपत्रका आधारमा क्याम्पसमा भर्ना लिएको र क्याम्पसको निर्वाचनमा मतदान गरेको दाबी गर्दै आएको छ। सोही मुद्दालाई लिएर प्रजिअ गणेश अर्यालसहित सरोकारवालाबीच पटकपटक छलफल भएको थियो।
आन्दोलन चर्किंदै गएको जेठ ४ गते संगठनले क्याम्पस प्रमुखको कार्यालय, विद्यार्थी कल्याण शाखा तथा खेलकुद शाखामा तालाबन्दी गरेको थियो । सोही दिन विद्यार्थी नेताहरू श्याम गुप्ता, अनिस पटेल र सागीर अलीलाई प्रहरीले नियन्त्रणमा लिएको थियो र साँझ रिहा गरेको थियो।
विद्यार्थी नेता श्याम गुप्ताका अनुसार, अब शंकास्पद प्रमाणपत्रहरू छानबिनका लागि जिल्ला प्रशासन कार्यालयमार्फत सम्बन्धित निकायमा पठाइनेछ। उनले भने “यथार्थ तथ्य छानबिनका साथै रहस्यको पर्दाफाश हुने भन्ने हाम्रो अपेक्षा छ ।”
