वीरगञ्ज, पर्सा — जगरनाथपुर गाउँपालिकाले आर्थिक वर्ष २०८२/८३ का लागि कुल रु. ४५ करोड ४१ लाख १७ हजार ११ को अनुमानित बजेट सार्वजनिक गरेको छ।
सोमबार जगरनाथपुर–४, सन्ठीस्थित विद्यालय प्रांगणमा सम्पन्न १३औं गाउँसभा अधिवेशनमा गाउँपालिका अध्यक्ष श्रीकान्त प्रसाद यादवले नीति तथा कार्यक्रमसहित बजेट प्रस्तुत गरेका हुन्।
बजेटका स्रोतहरू
अध्यक्ष यादवद्वारा प्रस्तुत बजेट विभिन्न संघीय, प्रादेशिक र स्थानीय स्रोतबाट संकलन गरिनेछ। बजेट स्रोत यसप्रकार छन्:
संघीय समानीकरण अनुदान — रु. १० करोड ५६ लाख
संघीय सशर्त अनुदान — रु. १८ करोड ३ लाख
संघीय विशेष अनुदान — रु. २ करोड ८९ लाख
संघीय राजस्व बाँडफाँट — रु. ८ करोड ८२ लाख २८ हजार
प्रदेश समानीकरण अनुदान — रु. ७३ लाख ४१ हजार
प्रदेश सशर्त अनुदान — रु. ८० लाख
प्रदेश विशेष अनुदान — रु. ३० लाख
प्रदेश समपूरक अनुदान — रु. २० लाख
प्रदेश राजस्व बाँडफाँट — रु. ८० लाख
आन्तरिक स्रोत तथा बैंक मौज्दात — रु. २ करोड ५५ लाख
बजेट विनियोजन र प्राथमिकता क्षेत्रहरू
अध्यक्ष यादवका अनुसार बजेट विनियोजन गर्दा स्थानीय आवश्यकता, सेवा प्रवाह र दीर्घकालीन विकासलाई आधार बनाइएको छ। मुख्य विनियोजन निम्नानुसार छन्:
कृषि क्षेत्र — रु. ७५ लाख
शिक्षा — रु. १ करोड ६३ लाख ४७ हजार
पशु सेवा — रु. १० लाख ५० हजार
स्वास्थ्य — रु. १ करोड ६० लाख ५८ हजार
सामाजिक विकास — रु. १ करोड
गाउँपालिका सञ्चालन तथा चालु खर्च — रु. १० करोड ५८ लाख
वडा कार्यालयमार्फत सञ्चालन हुने कार्यक्रम — रु. ३ करोड
सांसद रिजालको सुझाव: विकास र सेवा राजनीतिबाट अलग राख्नुपर्छ
गाउँसभामा प्रमुख अतिथिका रूपमा सहभागी भएका पूर्व उद्योगमन्त्री तथा पर्सा क्षेत्र नं. ४ का सांसद रमेश रिजालले जनप्रतिनिधिहरूलाई शिक्षा र स्वास्थ्यजस्ता आधारभूत सेवामा कमी हुन नदिन आग्रह गरे।
उनले भने, “जनताको सेवा र स्थानीय विकासमा राजनीति नहोस, सबै मिलेर अघि बढ्न जरुरी छ।”
सांसद रिजालले गाउँपालिकाको विकास योजनामा संसदस्तरबाट आवश्यक सहयोग गर्ने प्रतिबद्धतासमेत व्यक्त गरे।
विशिष्ट सहभागिता र वातावरण
गाउँपालिका अध्यक्ष श्रीकान्त प्रसाद यादवको अध्यक्षता र सांसद रिजालको प्रमुख आतिथ्यमा सम्पन्न भएको अधिवेशनमा उपाध्यक्ष बबीता सिंह क्षेत्री, प्रमुख प्रशासकीय अधिकृत सन्देश यादव, पाँचवटै वडाका अध्यक्षहरू, कार्यपालिका सदस्य, वडा सदस्य, कर्मचारी, नागरिक समाजका प्रतिनिधिहरू र सञ्चारकर्मीहरूको उल्लेखनीय उपस्थिति रहेको थियो।
गाउँसभाले आगामी वर्षका लागि निर्धारित नीतिगत मार्गदर्शन र बजेटमार्फत स्थानीय सेवा प्रवाह र विकासलाई गति दिने अपेक्षा गरिएको छ।
