भैरहवा, रुपन्देही — राष्ट्रिय एकता अभियानको आयोजनामा भैरहवामा ‘संघीय हिन्दू गणतन्त्रका लागि राष्ट्रिय अभियान : एक परिचय’ शीर्षकमा एक विशेष विचार–गोष्ठी सम्पन्न भएको छ।
कार्यक्रममा संघीय हिन्दू गणतन्त्रको अवधारणा, राष्ट्रिय पहिचानको रक्षा, र हिन्दू धर्म–संस्कृतिको संरक्षण विषयमा गहन छलफल गरिएको थियो।
कार्यक्रमका प्रमुख अतिथि तथा राष्ट्रिय एकता अभियानका केन्द्रीय अध्यक्षले वर्तमान राजनीतिक, सामाजिक र सांस्कृतिक परिप्रेक्ष्यमा हिन्दू गणतन्त्रको अवधारणा अपरिहार्य र सान्दर्भिक बन्दै गएको बताए।
उनले नेपालको हिन्दू सभ्यता, परम्परा र सांस्कृतिक गहिराइलाई स्मरण गर्दै भने, “धार्मिक र सांस्कृतिक पहिचानमाथि भइरहेका प्रहारलाई निरुत्साहित गर्न संघीय संरचना अन्तर्गत हिन्दू गणतन्त्रको परिकल्पना आजको आवश्यकता हो।”
‘हिन्दू गणतन्त्रले बहुलतावादी चरित्रलाई बल दिन्छ’
अध्यक्षले हिन्दू गणतन्त्रले नेपालजस्तो विविधतायुक्त देशमा धार्मिक स्वतन्त्रता, सहअस्तित्व र राष्ट्रिय एकता मजबुत पार्ने दाबी गरे।
उनले थपे, “यो अवधारणाले अन्य धर्म वा समुदायलाई उपेक्षा होइन, बरु सबैको अस्तित्वलाई मान्यता दिने दिशामा अघि बढ्छ।”
विशिष्ट सहभागीहरूको धारणा
कार्यक्रममा समाजसेवी दीपक अग्रवाल, इन्जिनियर प्रमोद राउत, र राजेन्द्र गुप्तालगायतले मन्तव्य राख्दै हिन्दू गणतन्त्रको पक्षमा समर्थन जनाए।
अग्रवालले नेपालमा हिन्दू सभ्यता नै राज्यको मौलिक चरित्र भएको दाबी गर्दै भने, “राज्य संरचना पुनर्संरचना गरी हिन्दू मूल्य र मान्यता समेट्न जरुरी छ।”
इञ्जिनियर प्रमोद राउतले राष्ट्रिय अस्मिता र एकताको रक्षा गर्दै सामाजिक समरसता कायम राख्न हिन्दू गणतन्त्रले सकारात्मक योगदान पुर्याउने बताए।
त्यस्तै, वक्ताहरूले युवाहरूलाई हिन्दू मूल्य–मान्यता र सांस्कृतिक संरक्षणमा अग्रसर हुन आह्वान गरे।
नवप्रवेशी नेताहरूको स्वागत
कार्यक्रमको विशेष क्षणमा रुपन्देहीका युवा नेता दिलीप कुमार यादव र नवलपरासीका आंशुमान चौहान राष्ट्रिय एकता अभियानमा प्रवेश गरेका छन्।
उनीहरूलाई अभियानका अध्यक्षले खादा ओढाएर औपचारिक स्वागत गरे।
आगामी योजना र प्रतिबद्धता
राष्ट्रिय एकता अभियानले संघीय हिन्दू गणतन्त्रको अवधारणा फैलाउन देशभर विचार–बहस, जनसंवाद र कार्यक्रमहरू संचालन गर्ने योजना बनाएको जनाएको छ।
कार्यक्रमको अन्त्यमा सहभागी सबैले हिन्दू राष्ट्रप्रतिको प्रतिबद्धता दोहोर्याउँदै सचेतना फैलाउने शपथ लिएका थिए।
