वीरगंज, ३० साउन — बिहान साढे आठ बज्नुअघि नै वीरगंजस्थित भारतीय महावाणिज्य दूतावासको आँगनमा देशभक्तिपूर्ण गीतहरू गुञ्जिन थालेका थिए। हल्का हावासँगै पर्खालमा टाँसिएका त्रिवर्णध्वजहरू फर्फराइरहेका थिए। भित्र, रंगीबिरंगी पोशाकमा सुसज्जित बालबालिका र कलाकारहरू आफ्नो पालोको प्रतीक्षामा थिए।
साढे ८ बजे, महावाणिज्यदूत देवी सहाय मिना आफ्नो औपचारिक पोशाकमा झण्डामञ्चतर्फ अगाडि बढे। उपस्थित दर्शकहरूको बीचमा एक क्षण शान्ति छायो। त्रिवर्णीय झण्डा विस्तारै माथि उक्लँदै हावामा फैलियो, अनि एक स्वरमा राष्ट्रगान बज्न थाल्यो। त्यस क्षण, उपस्थित भारतीय मात्र होइन, नेपाली अतिथिहरूको आँखामा पनि सम्मान र एकताको भाव झल्किरहेको देखिन्थ्यो।
संक्षिप्त तर भावपूर्ण सम्बोधनमा महावाणिज्यदूत मिनाले भने, “स्वतन्त्रता केवल अतीतको स्मरण होइन, यो हाम्रो साझा भविष्यको मार्ग हो। भारत–नेपालको मित्रता, विश्वास र सहकार्यलाई हामीले सधैं सँगै अगाडि बढाउनु पर्छ।” उनको आवाजमा गर्व र प्रतिबद्धता मिसिएको थियो।
कार्यक्रममा वीरगंजका व्यापारी, विद्यार्थी, पत्रकार, स्थानीय समाजसेवीदेखि दूतावासका अधिकारीसम्मको उपस्थिति थियो। सांस्कृतिक प्रस्तुतिहरूमा विद्यार्थीहरूको समूहद्वारा प्रस्तुत गरिएको देशभक्ति गीत, सङ्गीत र नृत्यले दर्शकको मन जित्यो।
यसैगरी, दिल्लीको लाल किल्लामा प्रधानमन्त्री नरेन्द्र मोदीले देशलाई सम्बोधन गर्दै आत्मनिर्भर भारतको यात्रा अझै तीव्र बनाउनुपर्नेमा जोड दिए। उनले मलदेखि ईभी ब्याट्री उत्पादनसम्म आत्मनिर्भरताको लागि आग्रह गरे। खपत बढाउन अक्टोबरदेखि जीएसटी दर घटाउने घोषणा गरे। व्यापार तनावका बीचमा स्थानीय उत्पादनमा जोड दिन र स्थानीय उत्पादनहरूलाई अगाडि बढाउन आग्रह गरे। यसैगरी देशको रक्षा गर्न नयाँ रक्षा प्रणालीको घोषणा गर्दै आक्रामक क्षमता बढाउने लगायत देशहितमा विभिन्न घोषणाहरु गरे।
