पर्सा – सर्वाेच्च अदालतमा विचाराधिन रहेको वीरगंज महानगरपालिकाको मुख्य सडक (मेनरोड) विस्तारको मुद्दाको सुनुवाइ २२औ पटक सरेको छ ।
त्रिभुवन राजपथअन्तर्गत वीरगंज महानगरपालिकाको गण्डक चोकदेखि पावर हाउस, घण्टाघर, आदर्शनगर, रजतजयन्ति चोक हुँदै मितेरीपुलसम्मको मुख्य सडक विस्तारको मुद्दा आइतवारका लागि पेशी तोकिएको थियो । तर, उक्त मुद्दा हेर्न नभ्याइनेमा परेपछि २२ओैं पटक मुद्दाको पेशी सरेको हो । सर्वोच्च अदालतको वेब साइटमा अङ्कित सूचना अनुसार २३औं पेशी आगामी असार ०९ गतेका लागि तोकिएको छ।
वीरगंजको मुख्य सडक विस्तारको मुद्दाको पेशी आइतवार सर्वोच्च अदालतका न्यायधिशद्वय डा.मनोजकुमार शर्मा र शारङ्गा सुवेदीको सयुक्त इजलाशमा परेको थियो ।
शुक्रवारकै मुद्धा सुनुवाईको निरन्तरता रहेकाले वीरगंज सडक विस्तारको मुद्धा हेर्न नभ्याइनेमा परेको सर्वोच्चका प्रवक्ता वेदप्रकाश उप्रेतीले जानकारी दिए ।
निवेदक लक्ष्मण साह रौनियार, राजकुमारी देवी तुलस्यान, भरत प्रसाद रौनियार र वीरेन्द्र कुमार संघाईले दायर गरेको रिटको पेशी आइतवार इजलास नं ७ को पहिलो नम्वमा परेको थियो ।
सडक विभागअन्तर्गत सडक डिभिजन कार्यालय, हेटौंडा र व्यापारिक मार्ग विस्तार आयोजना कार्यालयले २०७६ सालमा सडक विस्तार गर्ने तयारी गरे पनि मुद्दाको टुङ्गो नलाग्दा सडक विस्तारको काम अन्योलमा छ ।
