वीरगंज, ०४ असार — मौसम पूर्वानुमान महाशाखाका अनुसार आज देशभर साधारणदेखि पूर्ण बदली रहनेछ। कोशी, बागमती, गण्डकी र लुम्बिनी प्रदेशका धेरै स्थानहरूमा मेघगर्जन र चट्याङसहित हल्का देखि मध्यम वर्षाको सम्भावना रहेको छ। यिनै प्रदेशका एक-दुई स्थानहरूमा भने भारीदेखि अति भारी वर्षा पनि हुन सक्ने महाशाखाले जनाएको छ।
महाशाखाका अनुसार देशका उच्च पहाडी तथा हिमाली भू-भागका थोरै स्थानहरूमा हल्का वर्षा वा हिमपात पनि हुन सक्छ।
आज राति पनि मौसम बदली नै रहनेछ। कोशी, मधेश, बागमती, गण्डकी र लुम्बिनी प्रदेशका धेरै स्थानहरूमा र अन्य प्रदेशका केही स्थानहरूमा मेघगर्जनसहित हल्का देखि मध्यम वर्षा हुन सक्नेछ। यस्तै, कोशी, मधेश, गण्डकी र लुम्बिनी प्रदेशका थोरै स्थानहरूमा भारीदेखि अति भारी वर्षाको सम्भावना रहेको छ।
रातको समयमा कोशी, बागमती र गण्डकीका उच्च पहाडी तथा हिमाली भू-भागका थोरै स्थानहरूमा र अन्य प्रदेशका यस्तै भू-भागका एक–दुई स्थानमा हल्का वर्षा वा हिमपातको सम्भावना रहेको छ।
महाशाखाका अनुसार हाल कोशी, मधेश, बागमती, गण्डकी प्रदेशका केही भू-भाग र लुम्बिनी प्रदेशको पूर्वी भागमा मनसुनी वायुको प्रभाव देखिएको छ। त्यस्तै, देशको पश्चिमी भागमा पश्चिमी वायु र स्थानीय वायुको आंशिक प्रभाव रहेको छ भने भारतको पश्चिम बंगाल आसपास बनेको न्यूनचापीय क्षेत्रको समेत आंशिक प्रभाव परेको छ।
मौसमविद्हरूले जल–थल यातायात, पहिरो, बाढी तथा द्रुतबहाव हुने साना खोला–नालाहरू आसपास सतर्कता अपनाउन नागरिकलाई अनुरोध गरेका छन्।
