वीरगंज – आज दिउँसो देशका विभिन्न भू-भागमा आंशिकदेखि सामान्य बदलीको मौसम रहने जल तथा मौसम पूर्वानुमान महाशाखाले जानकारी दिएको छ। विशेषगरी कोशी प्रदेश र गण्डकी प्रदेश सहित देशका पहाडी क्षेत्रहरूमा आंशिकदेखि सामान्यतया बदली रहनेछ भने बाँकी भू-भागमा मौसम मुख्यतः सफा रहने मौसम पूर्वानुमान महाशाखाले जनाएको छ।
कोशी प्रदेशका केही स्थानहरूमा, मधेश, बागमती, र गण्डकी प्रदेश लगायत पहाडी भू-भागका थोरै स्थानहरूमा मेघगर्जन र चट्याङसहित हल्कादेखि मध्यम वर्षाको सम्भावना रहेको छ। साथै, देशका अन्य भू-भागका एक-दुई स्थानमा पनि यस्तै प्रकारको वर्षा हुन सक्ने अनुमान छ। कोशी प्रदेशको एक-दुई स्थानमा भने भारी वर्षाको सम्भावना पनि गरिएको छ।
त्यस्तै, कोशी र बागमती प्रदेशका उच्च-पहाडी तथा हिमाली भू-भागका थोरै स्थानहरूमा हल्का वर्षा वा हिमपात हुन सक्ने सम्भावना रहेको मौसमविद्हरूले बताएका छन्। बाँकी उच्च-पहाडी तथा हिमाली क्षेत्रका एक-दुई स्थानमा पनि यस्तै मौसमी अवस्था देखिने छ।
आज राति पनि कोशी, मधेश, बागमती, गण्डकी र सुदूरपश्चिम प्रदेश लगायत देशका पहाडी भू-भागमा आंशिकदेखि सामान्य बदलीको अवस्था रहनेछ। कोशी प्रदेशका केही स्थानहरूमा रातको समयमा पनि मेघगर्जनसहित हल्कादेखि मध्यम वर्षाको सम्भावना छ।
गण्डकी प्रदेशको एक-दुई स्थानमा पनि भारी वर्षा हुन सक्ने सम्भावना गरिएको छ। त्यस्तै, कोशी प्रदेशको उच्च-पहाडी तथा हिमाली भू-भागका थोरै स्थानहरूमा राति हल्का वर्षा वा हिमपात हुनसक्ने पूर्वानुमान गरिएको छ।
जल तथा मौसम विभागले वर्षाको सम्भावनालाई ध्यानमा राखी आवश्यक सतर्कता अपनाउन आग्रह गरेको छ।
